歡迎大家收睇八點踏十一新聞報導：
今日懷疑係清晨時分，又可能係早晨嘅時分，一名懷疑係40 – 100歲嘅中年至老年可能係晚年嘅疑似地球藉亞洲或歐洲操流利廣東話嘅男性……
或可能係女性但男性打扮嘅人氏，喺九龍塘一個唔算好等邊嘅三角形嘅三角仔公園，一個未算非常暗但客觀條件有些少暗嘅疑似暗角位……
將自己嘅懷疑係大炮放置於公園嘅相信係中央位置嘅一個大概係實心，目測應該有一定承托力嘅一張石桌嘅中心位置。
於哩一名疑似中年至老年男性打扮嘅懷疑係男仕嘅人仕對面，亦坐咗一名可能穿著增高鞋墊先達至中等身才嘅一名中年至老年男性打扮嘅懷疑係男仕嘅人仕。
雙方現在正進行對峙並維持住相信係膠著住嘅狀態，懢於本台嘅記者相信並非雙方心入面條虫或褲入面條蛇，故無法猜測雙方下一步嘅任何行動。
喺現場嘅攝影師錄得正在與事件主角進行對峙嘅男性打扮嘅懷疑係男仕嘅人仕現在有下一步行動。
懷疑係事件嘅第二主角現在將馬放置於對方剛才於清晨時分，又可能係早晨嘅時分放置出嚟係大炮之上，並威脅住對方將會「將軍抽車」，而事件主角亦經過可能係一輪深思熟慮嘅停頓之後相信係決定「棄車保帥」，根據現場攝影師錄得嘅影象及聲音顯示，第二主角拎走主角隻車之後大叫：「再將！」。
新聞報導完畢，有機會再見。又或者，冇機會再見。
Search